乜嘢叫做有？乜嘢叫做無？

吊頸都要透下氣。今日我做嘢做到五點幾，好攰，想離開一下間書房，出去行下。就喺 e 個時候，呀單撈強打電話嚟，叫我同佢飲下啤酒，因為佢心情好鬼悶。 Ok，六點喺番個間「傾時啱」見。臨收線個陣，佢重加多句：「快啲喎，我好鬼 down！」

我去到酒吧時，佢自己已經嚉咗兩個「大加」，面紅紅，眼濕濕咁。我問佢：「你做乜喺咁 down 呀？你係 BT 精，有乜嘢你係 download 唔到架？」啤酒妹妹走過嚟，問我要乜？我要咗個 Guiness draft.

單撈強好燜憎咁話：「我都唔明，點解你身邊可以有咁多女人圍住你車車咁轉，睇你都唔係話好靚仔個款吖？而我？四張幾，重係吊吊 fing。你話嘞，我衰邊瓣吖？我邊度唔及人呀？」講完，一口飲埋個半杯大加，又叫多一個。

我安慰下佢話：「呀大哥，你唔好咁講啦，我啲都係普通朋友啫！朋友，唔係男就係女架啦！.........」

我想講落去，但係佢已經一嘢捉住我隻手，用好哀求嘅眼神同我講：「你咁多女人，邊個唔啱你使，咪彈過嚟，當益下細佬囉！.........我覺得人生真係好苦悶呀！」講完，佢真係好想喊個種樣。

我聽到，唔知好嬲抑或好笑，不過其實我好戥佢悲哀。唔係悲佢無女人，而係悲佢咁諗嘢，咁做人。我話：「單撈強，你唔好亂咁諗嘢啦！要有嘅時候，就會有架啦！你嘅心情我好明，但係做人嘅嘢，隨意就得啦！今日，我請你飲杯啤酒啦！」我叫啤酒妹妹過嚟，埋咗張單，又講：「喂，我又好鬼死多嘢做，我都係出嚟透下氣咋！唔同你嗲咁多啦！.........喂，重有，你唔好再飲啦，四十幾歲人，小心個肝呀！」

我走出咗個間酒吧，記得耶穌好似講過：「有的，還要加給他。無的，連他有的也要奪去！」之類嘅一句話。我苦笑咗一下。唉！我都係快啲番去做嘢最實際。